ကျွန်ုပ်တို့ အကြောင်း : ဖောင်ဒေးရှင်းအကြောင်း
ဖရီးဒရစ်(ချ်) နောင်းမန်း ဖောင်ဒေးရှင်းသည် ဂျာမနီနိုင်ငံမှ နိုင်ငံရေးဖောင်ဒေးရှင်းတစ်ခုဖြစ်သည်။ ဖောင်ဒေးရှင်းသည် ၄င်း၏မိတ်ဖက်အဖွဲ့အစည်းများနှင့် လက်တွဲ၍ ဂျာမနီနိုင်ငံနှင့် ကမ္ဘာ့နိုင်ငံပေါင်း ၆၀ ကျော်တို့၌ လွတ်လပ်မှု၊ လစ်ဘရယ်ဝါဒ၊ ဒီမိုကရေစီစနစ်၊ လူ့အခွင့်အရေး၊ ဗဟုဝါဒ၊ သည်းခံခြင်း၊ ရာသီဥတုပြောင်းလဲမှုကို လျှော့ချခြင်း၊ ပွင့်လင်းသော ဒစ်ဂျစ်တယ် လူမှုအဖွဲ့အစည်း၊ လူမှုစျေးကွက် စီးပွားရေးစနစ် နှင့် တရားဥပဒေစိုးမိုးခြင်းတို့ကို အားပေးမြှင့်တင်ပေးလျှက်ရှိသည်။ ဖောင်ဒေးရှင်းသည် နိုင်ငံသားဆိုင်ရာကိစ္စရပ်များ ပညာပေးခြင်း (civic education)ကို ဦးစားပေးဆောင်ရွက်နေသည့် အကျိုးအမြတ်မယူသော အဖွဲ့အစည်းဖြစ်ပါသည်။
ဖောင်ဒေးရှင်းနှင့် ဂျာမနီနိုင်ငံရှိ လွတ်လပ်သောဒီမိုကရေစီပါတီ Free Democratic Party (FDP) အကြား နီးစပ်သော ဆက်သွယ်ဆံရေးများရှိပါသည်။ ဖောင်ဒေးရှင်းကို ၁၉၅၈ ခုနှစ်တွင် ဂျာမနီ နိုင်ငံတော်သမ္မတ ထေအိုဒိုးဝါး ဟွိုက်စ် Theodor Heuss က စတင်ထူထောင်ပေးခဲ့ပါသည်။ ရုံးချုပ်သည် ပေါ့စ်ဒန်းမြို့တွင်တည်ရှိပြီး ၄င်းမြို့သည် ဘာလင်မြို့၏ အပြင်ဖက်ကပ်ရပ်တွင် တည်ရှိနေသော မြို့လည်း ဖြစ်သည်။ ဖောင်ဒေးရှင်းအနေဖြင့် ဆုံးဖြတ်ချက်ချပိုင်ခွင့်အာဏာရှိသူများအား အကြံပေးခြင်း၊ ဆွေးနွေးပွဲများဖြစ်မြောက်အောင် ဆောင်ရွက်ပေးခြင်း၊ ဆေွးနွေးပွဲညီလာခံများ ကျင်းပပေးခြင်း၊ ပုံနှိပ်ထုတ်ဝေမှုများအား ငွေကြေးထောက်ပံ့ပေးခြင်းနှင့် ကမ္ဘာတစ်ဝန်းရှိလူသားများအား ဂျာမနီနိုင်ငံရှိ ဆွေးနွေးပွဲများနှင့် အခြားဆွေးနွေးပွဲများသို့ တက်ရောက်နိုင်ရန် ဖိတ်ကြားခြင်းဆိုင်ရာ ကိစ္စရပ်များအား ဆောင်ရွက်လျက်ရှိပါသည်။
နိုင်ငံတကာအတိုင်းအတာအားဖြင့်ဆိုရသော် ဖောင်ဒေးရှင်းသည် ၄င်း၏စံတန်ဖိုးများနှင့်ထပ်တူကျပြီး လွတ်လပ်မှုကဏ္ဍကို မြှင့်တင်ဆောင်ရွက်ရာတွင် ပူးပေါင်းပါဝင်လိုစိတ်ရှိသော အစိုးရ၏ အဖွဲ့အစည်းများ၊ အစိုးရမဟုတ်သော အဖွဲ့အစည်းများ၊ ပညာရပ်နယ်ပယ်ကဏ္ဍ၊ နိုင်ငံရေးပါတီများ၊ သုတေသီများ၊ ကျောင်းသားများ၊ စာနယ်ဇင်းသမားများ၊ တက်ကြွလှုပ်ရှားသူများ၊ ကနဦးလုပ်ငန်း စတင်တည်ထောင်သူများ၊ အနုပညာရှင်များနှင့်အတူ လက်တွဲလုပ်ကိုင်လျက်ရှိပါသည်။ ဖောင်ဒေးရှင်းသည် ပုဂ္ဂလိကဆိုင်ရာလွတ်လပ်ခွင့်များနှင့် ခိုင်မာသော ဒီမိုကရေစီအုတ်မြစ် အဖွဲ့အစည်းများ၏ အရေးပါမှုကို အထူးအလေးထားလျက် ပူးပေါင်းဆောင်ရွက်လုပ်ကိုင်ခြင်း၊ ရေရှည်ကို မှေျာ်ကိုးသော မိတ်ဖက်ပြုခြင်း တို့ကို အလေးပေးဆောင်ရွက်လျက်ရှိပါသည်။ စျေးကွက်စီးပွားရေး ဆိုင်ရာ လွတ်လပ်ခွင့်နှင့် ကုန်ကူး သန်းရောင်းဝယ်ခြင်းဆိုင်ရာ လွတ်လပ်ခွင့်တို့ကို ရရှိစေရန်အတွက် ကြိုးစားဆောင်ရွက်ပေးလျက်ရှိပြီး ဖောင်ဒေးရှင်းအနေဖြင့် စီးပွားရေးလုပ်ငန်းများအား လူ့အခွင့်အရေး တို့ကို လေးစားလိုက်နာကြရန် တိုက်တွန်းအပ်ပါသည်။ ခေတ်မီမြို့တော်များ (smart cities) တွင် အသုံးပြုသကဲ့သို့ နည်းပညာအဆင့်မြှင့်တင်ခြင်းများကို အသုံးချလျက် ရာသီဥတုပြောင်းလဲမှုများကို လျှော့ချနိုင်ရန် ဆောင်ရွက် လျက်ရှိပါသည်။
မြန်မာနိုင်ငံသည် အကူးအပြောင်းကာလတွင် တည်ရှိနေဆဲ နိုင်ငံတစ်နိုင်ငံဖြစ်ပါသည်။ ဖောင်ဒေးရှင်း၏ မြန်မာပြည်ရုံးကို ၂၀၁၃ ခုနှစ်တွင် ရန်ကုန်မြို့၌ စတင်ဖွင့်လှစ်ခဲ့ပြီး ယင်းအချိန်ကတည်းကပင် ယခုအချိန်အထိ မြန်မာနိုင်ငံ၏ ဒီမိုကရေစီစနစ်နှင့် စီးပွားရေးဆိုင်ရာ ဖွံ့ဖြိုးတိုးတက်မှုတို့ကို အစဉ်တစိုက် ထောက်ပံ့ကူညီဆောင်ရွက်ပေးလျက်ရှိပါသည်။ ဖောင်ဒေးရှင်သည် မတူညီကွဲပြားလှသော လုပ်ငန်းပရောဂျက်များစွာကို ဆောင်ရွက်နေသည်သာမက အစိုးရမဟုတ်သောအဖွဲ့အစည်းများ၊ တက္ကသိုလ်များနှင့် စီးပွားရေးလုပ်ငန်းများမှ လုပ်ဖော်ကိုင်ဖက်ပေါင်းမြောက်မြားစွာနှင့်လည်း လက်တွဲ ဆောင်ရွက်လျက်ရှိသည်။ သုတေသနလုပ်ငန်းများ၊ အစီအစဉ်လိုက် ဆွေးနွေးပွဲများနှင့် လက်တွေ့ သင်တန်းများကို စီစဉ်ကျင်းပပေးလျက်ရှိပါသည်။ ဖောင်ဒေးရှင်း၏ လုပ်ငန်းပရောဂျက်များအနက်မှ ဒီမိုကရေစီစနစ် ကောင်းမွန်စွာရှင်သန်လည်ပတ်နိုင်ရေးအတွက် အခြေခံအုတ်မြစ်ဖြစ်သော အများပြည်သူဆွေးနွေးပွဲများ တိုးမြှင့်ဆောင်ရွက်ပေးခြင်းသည်လည်း အရေးကြီးသောအခန်းကဏ္ဍတွင် ပါဝင်သည်။ ကနဦးလုပ်ငန်းစတင်တည်ထောင်သူများ၊ အသေးစားနှင့် အလတ်စားလုပ်ငန်းများသည် အစိုးရပိုင် လုပ်ငန်းကြီးများနှင့် အလွန်ခက်ခက်ခဲခဲ အစဉ်အမြဲ ယှဉ်ပြိုင်နေရခြင်းတို့ကြောင့် ဖောင်ဒေးရှင်းသည် ၄င်းတို့နှင့် နီးနီးကပ်ကပ်လုပ်ဆောင်လျက်ရှိပြီး ပွင့်လင်းပြီး မျှတသော စျေးကွက်စီးပွားရေးယှဉ်ပြိုင်ခြင်းတို့ တိုးတက်ဖြစ်ပေါ်လာစေရေးကို အလေးထားဆောင်ရွက် လျက်ရှိပါသည်။
FNF သည် ဂျာကာတာ၊အင်ဒိုနီးရှားတွင် ရုံးခွဲစတင်ဖွင့်လှစ်ခဲ့သည့် ၁၉၆၉ ခုနှစ်မှ စတင်ကာအရှေ့တောင်အာရှတွင်လုပ်ငန်းများလုပ်ဆောင်လျက်ရှိပါသည်။ ယနေ့တွင်တော့ ဘန်ကောက်၊ ဟနွိုင်း၊ ဂျာကာတာ၊ မနီလာ၊ ဆိုးလ်၊ တိုင်ပေနှင့် ရန်ကုန်တို့တွင် ရုံးခွဲ ၇ ခုဖွင့်လှစ်ပြီးဖြစ်သည်။ မလေးရှားတွင်လည်း လက်ရှိတွင် လုပ်ကိုင်လျက်ရှိပါသည်။