ადამიანის უფლებები

საბა სხვიტარიძის ისტორია

საბა სხვიტარიძეს ბრალი ედება სისხლის სამართლის კოდექსის 3531 მუხლის მე-2 ნაწილით გათვალისწინებული დანაშაულის ჩადენაში. კერძოდ, ბრალდების მტკიცებით, იგი 2024 წლის 4 დეკემბერს, საღამოს საათებში, თბილისში, სასტუმრო „მერიოტის“ მიმდებარე ტერიტორიაზე, თავს დაესხა პოლიციელს - მირიან ქავთარაძეს და თავში ორჯერ ჩაარტყა ხელკეტის მსგავსი საგანი, რითაც ჩაიდინა „სამსახურებრივ საქმიანობასთან დაკავშირებით პოლიციელის ჯანმრთელობის ხელყოფა“. აღნიშნული დანაშაულისთვის გათვალისწინებულია სასჯელი - თავისუფლების აღკვეთა ვადით შვიდიდან თერთმეტ წლამდე.

საბა სხვიტარიძე უკვე თითქმის ორი თვეა პატიმრობაში იმყოფება. როგორც ყველა სხვა საქმეში, რომელიც პროტესტის მონაწილეებს შეეხება, მასაც პირველი და სააპელაციო ინსტანციის სასამართლოებმა, სათანადო დასაბუთების გარეშე, აღკვეთის ღონისძიების სახით პატიმრობა შეუფარდეს.